حالة شايف نفسه

بعض الشباب الثوري مستغرب من مواقفي من وقت انتخابات الرئاسة، وبيفسرها إني إخوان مستتر وعضو خفي في التنظيم السري، أو إنهم شربوني شاي بالياسمين وأكلوني سندوتش جبنة رومي، وإني بعت القضية (معرفش لمين وقبضت ازاي وبعدين هي القضية دي بتتباع كام مرة عشان كل كام يوم بعد أي تعليق على خبر أو حدث حد يؤكد إني بعت القضية). والشباب ده لما بيلاقيني بانتقد الاخوان أو مرسي أو هانتقدهم مستقبلا هيفسر الموضوع بإن: "اتضحك عليه والصفقة باظت" و"اللي وعدوه بيه متنفذش" .. أو "أخيرا فاق" .. أو "دي تمثيلية عشان يبين إنه محايد" أو "بيدور على مصلحته في حتة تانية لما لقى الاخوان مش معبرينه" إلخ إلخ إلخ.

وبعض الشباب الإخواني سعيد جدا بمواقفي وبيكتبلي رسائل وتعليقات الشكر والثناء عن إنصافي ومواقفي النبيلة في الوقوف مع الحق (اللي بعضهم بيختزله في مواقف الجماعة) وصفحاتهم حتى الرسمية منهم بتنقل كلامي وتنزله على إنه آراء تستحق القراءة، بس لما بانتقد الإخوان أو مرسي أو لما هانتقدهم مستقبلا مفيش حاجة من كلامي بتتنقل على أي من الصفحات دي (إلا ما رحم ربك) وبعض شباب الإخ...

وان بيكتب تعليقات من نوع "ظهرت على حقيقتك يا متلون" و "إنت شخص غير منصف" و"إنت متعصب ضد مشروع النهضة وجماعة الإخوان" و"موتوا بغظيكم" .. إلخ إلخ إلخ.

وبعض الشباب دلوقتي هيكتب تعليق: هو إنت هتعمل نفسك حاجة .. إنت أساسا ولا حاجة .. وكل الموضوع إنك واحد شايف نفسه ..

بغض النظر عن دولهمّ ودوكهمّ .. عايز لما أبص في المراية مشوفش شخص بيعبر عن آراء أنا مش مقتنع بيها لمجرد إرضاء الناس ..

عايز لما أبص في المراية: أشوف نفسي ..

بقلم :وائل غنيم