أنا متابع لعدد كبير جدا من صفحات الفيسبوك .. باحب أعرف مختلف وجهات النظر والآراء .. وباحب أتعلم وأستفيد من الأفكار المتنوعة .. من ضمن الصفحات دي كتير منها صفحات مؤيدة للثورة .. ومن فترة أصبح من الأمور اللي بتلفت نظري أو بمعنى أصح بتضايقني وبتثير استغرابي من الــــبــــعــــض هو الازدواجية اللي بنعاني منها ..
- بنزعل جدا لما حد ينشر إشاعة بتشوه سمعة شخص أو كيان بنحبه أو بنحترمه ونطالب ناشر الإشاعة بالدليل على صحة كلامه .. بس بعضنا معندوش أي مشكلة ينشر إشاعة بتشوه سمعة شخص أو كيان بيكرهه بدون أي محاولة للتوثق من صحة المعلومة ..
...
- بنعتبر إن الاعتداء على أي اعتصام سلمي جريمة في حالة لما بنكون متفقين فكريا مع المعتصمين أو مبدأيا مع فكرة الاعتصام وبنتّهم اللي عملوا الاعتداء ده إنهم بلطجية .. بس لما بنشوف اعتصام سلمي معارض لينا بيتفض بنبقى فرحانين وبنتكلم بشكل إيجابي عن اللي ساهموا في فضه وكأنهم أبطال ..
- بنوصف اللي بيشتم أو بيعتدي على أي شخصية عامة بنحبها بقليل الأدب والبلطجي .. في نفس الوقت اللي بنوصف فيه اللي بيشتم أو بيعتدي على أي شخصية عامة بنكرهها بالجدع والراجل ..
للأسف الأمثلة دي بتتكرر بشكل يومي وبعض اللي بيقعوا في الأخطاء دي بيكونوا من الشباب المثقف والمتعلم المشارك بالثورة .. لازم نعرف إن نجاحنا مرهون بمصداقيتنا واتساقنا مع أنفسنا .. مهم نضع ثوابت ومبادئ نحترمها ونسير عليها مع من يخالفنا قبل من يتفق معنا .. الانصاف يرحمكم الله ..
وائل غنيم
ليست هناك تعليقات:
إرسال تعليق